Ndërsa bota përkujton Ditën Botërore të Lirisë së Shtypit, unë e gjej veten duke reflektuar mbi rëndësinë e lirisë së shtypit dhe rolin e gazetarëve në promovimin e transparencës, llogaridhënies dhe përmirësimit të cilësisë së raportimit të lajmeve. Fatkeqësisht, vetë shoqata e gazetarëve në Kosovë që supozohet të mbështesë gazetarinë e pavarur dhe të kërkojë llogari nga qeveria ka treguar pak ose aspak interes për rastin tim. Asociacioni i Gazetarëve të Kosovës ka dështuar në përmbushjen e misionit dhe detyrës së saj për të mbështetur të gjithë gazetarët pa dallim, dhe për këtë, nevojitet veprim urgjent për mbrojtjen e të drejtave të gazetarëve në Kosovë.
Si një gazetar i pavarur që ia kam kushtuar jetën kërkimit të së vërtetës dhe raportimit për çështje komplekse politike, jam përballur me sfida të shumta në Kosovë. Në vitin 2011, kam hulumtuar lidhur me dyshimet për korrupsion policor në qytetin tim të lindjes në Gjilan dhe jam kërcënuar nga bashkëshorti i komandantes rajonale të policisë. Pavarësisht kërcënimeve, unë refuzova të ndaloja përpjekjet profesionale për t’i verifikuar pretendimet dhe si pasojë, burri i komandantes rajonale të policisë së Gjilanit më kërcënoi se do të më vriste para babait tim, duke shkaktuar tensione të konsiderueshme në marrëdhëniet tona familjare dhe duke na vënë të gjithëve në rrezik.
Në vitin 2012, unë u sulmova nga një polic i cili u identifikua si shoferi personal i kryekomandantes rajonale, burri i së cilës më kishte kërcënuar vetëm disa muaj më parë.
Pas deklaratës sime publike se do të inicoj një padi gjyqësore kundër Republikës së Kosovës për të kërkuar llogari, kërcënimet ndaj meje vetëm sa u intensifikuan dhe më 24 Janar, 2012 – njësitet speciale të armatosura të policisë më arrestuan nën pretendime të rreme.
Nga frika për sigurinë time, u largova nga Kosova dhe raportova nga Siria. Në prill të vitit 2015, u detyrova të largohesha nga vendi për shkak të kërcënimeve të shtuara ndaj meje dhe familjes sime.
Pavarësisht sfidave me të cilat u përballa, tani e 11 vite mbeta i përkushtuar për të kërkuar drejtësi dhe llogari. Në maj të vitit 2012, kam dorëzuar një rast gjyqësor duke kërkuar llogaridhënie nga Republika e Kosovës dhe gjykimi filloi. Përderisa gjykata komunale e Prishtinës në shtator 2015 më ofroi kompensim financiar, duke pranuar dëmin fizik dhe psikologjik që kisha pësuar, ata nuk arritën të adresonin se kush ishte përgjegjës për sulmin. Po atë muaj, unë apelova vendimin e tyre fillestar dhe në nëntor të vitit 2022, Gjykata e Apelit miratoi ankesën time dhe çështja tani është në rigjykim.
Për 11 vjet rresht: Asociacioni i Gazetarëve të Kosovës dështon t’i mbështesë gazetarët pa dallim!
Gjatë gjithë rastit tim, kam kontaktuar disa herë me Asociacionin e Gazetarëve të Kosovës, duke shpresuar në mbështetjen e tyre si një shoqatë që financohet për të ofruar mbështetje për të gjithë gazetarët. Fatkeqësisht, përpjekjet e mia për t’u angazhuar me ta kanë qenë të pasuksesshme. Më 15 maj bëhen 11 vjet që kur kam paraqitur çështjen time gjyqësore duke kërkuar llogari nga Republika e Kosovës dhe kam zgjedhur të kontaktoj edhe një herë AGK-në. Unë u dërgova atyre një email më 13 prill 2023, duke shprehur zhgënjimin tim për dështimin e tyre për të treguar ndonjë interes serioz për rastin tim. Unë vazhdova me një email të dytë më 24 prill 2023, duke përsëritur rëndësinë e mbështetjes së tyre për gazetarët e pavarur si unë, të cilët kërkojnë transparencë, llogaridhënie dhe përmirësimin e cilësisë së raportimit të lajmeve. Megjithatë, nuk kam marrë asnjë përgjigje prej tyre.
Asociacioni i Gazetarëve të Kosovës pretendon se “promovon, inkurajon dhe përmirëson cilësinë dhe gazetarinë e hapur në Kosovë, si dhe përmirëson pozitën e gazetarëve në përgjithësi në shoqërinë kosovare”. Dështimi i Asociacionit të Gazetarëve të Kosovës për të përmbushur misionin dhe detyrën e saj për të mbështetur të gjithë gazetarët është një tregues i qartë i gjendjes së rëndë të lirisë së shtypit në Kosovë. Në vend që të mbështesë gazetarët pa dallim, shoqata ka qenë selektive në qasjen e saj, duke dështuar të angazhohet me gazetarë të dëshmuar të pavarur si unë, të cilët nuk janë të lidhur me asnjë parti politike, por kërkojnë transparencë, llogaridhënie dhe përmirësim në cilësinë e raportimit të lajmit.
Nuk është e rrallë të dëgjosh reagimet e AGK-së se ata po ngrejnë zërin në mbrojtje të profesionit gazetaresk, por disa prej “gazetarëve” në realitet nuk janë më shumë se mercenarë të kriminalitetit të organizuar dhe korrupsionit e që në saje të vellos së gazetarit vërsulen në mbrojtje të individëve të cilët e kanë plaçkitur vendin për dy dekada në mënyrë të pabesueshme, duke nxitur një cikël të rrezikshëm të dezinformimit dhe frikës.
Për më tepër, fakti që një shumicë e madhe e mediave dhe personelit të tyre janë në shkelje të rëndë të parimeve themelore të raportimit të lajmeve dhe sjelljes etike, nxit pyetje serioze në lidhje me angazhimin e AGK-së që thotë se misioni i tyre është përmirësimi i cilësisë së raportimit të lajmeve.
Përkundër apatisë së dukshme dhe mungesës së mbështetjes nga Asociacioni i Gazetarëve të Kosovës, unë mbetem i përkushtuar për të luftuar për lirinë e shtypit dhe integritetin gazetaresk në Kosovë dhe më gjerë. Përvoja ime për fat të keq nuk është unike, pasi gazetarët në mbarë botën përballen me sfida të ndryshme, duke përfshirë çenzurën, dhunën fizike dhe ngacmimet ligjore.
Roli i gazetarëve është që të mbajnë para përgjegjësisë ata që janë në pushtet dhe të shërbejnë si zë për njerëzit. Kur gazetarët heshten ose kërcënohen, publiku privohet nga informacioni i rëndësishëm dhe mundësia për t’i mbajtur para përgjegjësisë ata që janë në pushtet shmanget. Kjo është arsyeja pse liria e shtypit është kaq kritike dhe pse është thelbësore që gazetarët të jenë në gjendje të bëjnë punën e tyre pa frikën e ndëshkimit.
Në mbarë botën, liria e shtypit përballet me kërcënime të shumta. Kosova nuk bën përjashtim, pasi qeveritë, grupet e organizuara kriminale dhe individët e fuqishëm të lidhur me pushtetarët e ish-pushtetarët përdorin taktika për të shtypur zërat kritikë dhe për të mbajtur pushtetin e tyre. Këto taktika shpesh përfshijnë dhunën fizike, ngacmimin ligjor dhe çenzurën, duke i lënë gazetarët pa mbështetjen e institucioneve që supozohet t’i mbrojnë ata. Në disa raste, shoqatat që pretendojnë se mbrojnë të drejtat e gazetarëve kanë dështuar ta bëjnë këtë, madje janë bërë bashkëfajtorë në cenimin e lirisë së shtypit. Lufta për gazetari të pavarur vazhdon, jo vetëm në Kosovë, por në mbarë globin.
Kjo është arsyeja pse organizatat si Asociacioni i Gazetarëve të Kosovës janë kaq të rëndësishme. Ata kanë burimet dhe mandatin për të mbështetur gazetarët dhe për të mbrojtur lirinë e shtypit. Megjithatë, kur këto organizata nuk arrijnë të përmbushin misionin e tyre dhe nuk arrijnë të mbështesin gazetarët e pavarur, kjo minon të gjithë profesionin e gazetarisë dhe vë në rrezik demokracinë dhe qeverisjen e mirë.
Në këtë Ditë Botërore të Lirisë së Shtypit, është thelbësore që ne të ripërkushtohemi ndaj vlerave të lirisë së shtypit dhe rolit kritik që gazetarët luajnë në promovimin e demokracisë dhe qeverisjes së mirë. Është gjithashtu e rëndësishme që ne të mbajmë përgjegjës ata që kërkojnë të heshtin zërat kritikë dhe të privojnë publikun nga informacione të rëndësishme.
Si një gazetar i pavarur që është përballur me sfida të mëdha në Kosovë dhe përtej saj, i bëj thirrje Asociacionit të Gazetarëve të Kosovës që ta marrë seriozisht rastin tim dhe të punojë me mua për të inkurajuar institucionet që ta shërbejnë drejtësinë që më takon mua si gazetar e shtetas i Republikës së Kosovës dhe të urdhëroj llogaridhënie për individët apo grupet e interesit të dyshuara si të përfshira në sulmin ndaj meje. Gjithashtu u bëj thirrje të gjithë gazetarëve, institucioneve dhe individëve që kujdesen për lirinë e shtypit të qëndrojnë me mua dhe të kërkojnë që pushtetarët të respektojnë rolin jetësor që luajnë gazetarët në shoqërinë tonë.
Ne duhet të punojmë të gjithë së bashku për të mbrojtur të drejtat e gazetarëve dhe për të siguruar që ata të jenë në gjendje të bëjnë punën e tyre pa frikën e ndëshkimit. Nga kjo varet e ardhmja e demokracisë dhe lirive që shoqëria jonë i gëzon.
Si anëtarë të shtypit, ne kemi përgjegjësi për të mbajtur veten në standardet më të larta të profesionalizmit dhe integritetit. Publiku nuk meriton asgjë më pak se raportim të saktë dhe të vërtetë, pa ndikimin e elementëve kriminalë ose përfitimeve personale. Vetëm duke respektuar këto vlera, mund të shpresojmë të rigjejmë besimin e lexuesve dhe dëgjuesve tanë, dhe të rikthejmë rolin e respektin thelbësor që gazetarët luajnë në një demokraci të shëndetshme dhe funksionale.
